ആവശ്യപ്രേരിത ജനാധിപത്യം

“ഇത് ഇപ്പോൾ തന്നെ സാധ്യമല്ലേ?”

കഴിയും. ഗ്രാമസഭ എന്ന സംവിധാനത്തിലൂടെ ജനങ്ങൾക്ക് ആവശ്യങ്ങൾ ഉന്നയിക്കാനും ചർച്ച ചെയ്യാനും ചില തീരുമാനങ്ങളിൽ നേരിട്ട് പങ്കെടുക്കാനും നിലവിൽ തന്നെ അവസരമുണ്ട്.

ഗ്രാമസഭയ്ക്ക് യഥാർത്ഥത്തിൽ എന്തൊക്കെ അധികാരങ്ങളുണ്ട്?

ഗ്രാമസഭയിൽ...

1. ചോദ്യങ്ങൾ ചോദിക്കാം.
2. അഭിപ്രായം രേഖപ്പെടുത്താം.
3. പരിഹാരങ്ങൾ നിർദ്ദേശിക്കാം.
4. പ്രമേയം അവതരിപ്പിക്കാം.
5. പദ്ധതികൾക്ക് മുൻഗണന നിശ്ചയിക്കാം.
6. ഗുണഭോക്താക്കളെ തിരഞ്ഞെടുക്കാം.
7. പദ്ധതികൾ നിരീക്ഷിക്കാം.
8. ചെലവുകളും ഓഡിറ്റ് റിപ്പോർട്ടുകളും പരിശോധിക്കാം.
9. ഉദ്യോഗസ്ഥരോട് മറുപടി ആവശ്യപ്പെടാം.
10. സാമൂഹിക ഓഡിറ്റ് നടത്താം.
11. ഗ്രാമസഭ എടുത്ത തീരുമാനങ്ങൾ നടപ്പിലായില്ലെങ്കിൽ കാരണം അറിയാം.

പക്ഷേ സാധാരണ ജനങ്ങൾക്ക് ഇതെത്രത്തോളം അറിയാം?

നിയമത്തിൽ നൽകിയിട്ടുള്ള അധികാരങ്ങൾ ഉണ്ടായിട്ടും, സാധാരണ പൗരന് ഗ്രാമസഭയുടെ അധികാരങ്ങളും അത് എങ്ങനെ ഉപയോഗിക്കാമെന്നും വ്യക്തമായി അറിയാത്ത അവസ്ഥയുണ്ട്.

കൂടാതെ സമയപരിമിതി മൂലം രേഖകളുടെ പകർപ്പുകൾ ലഭ്യമാക്കൽ, കഴിഞ്ഞ യോഗത്തിലെ ചോദ്യങ്ങളുടെ മറുപടികൾ, പഞ്ചായത്ത് എടുത്ത തീരുമാനങ്ങളുടെ വിശദീകരണങ്ങൾ, ഒരുമിച്ചുള്ള മറുപടിക്ക് പകരം ഓരോ അവതരണത്തിൻ മേലുള്ള ചർച്ച, യോഗം പിരിയും മുമ്പ് അന്നെടുത്ത തീരുമാനങ്ങളുടെ അവതരണം, അതിൽ ഒപ്പ് വെക്കൽ എന്നിങ്ങനെ ഒട്ടനവധി കാര്യങ്ങൾ നടക്കാതെ പോകുന്നു.

ഗ്രാമസഭയെ കൂടുതൽ ശക്തമാക്കാനാകുമോ?

തീർച്ചയായും... നിലവിലുള്ള ഗ്രാമസഭയെ കൂടുതൽ ആളുകൾക്ക്, കൂടുതൽ സമയത്ത്, കൂടുതൽ കാര്യങ്ങളിൽ പങ്കെടുക്കാൻ കഴിയുന്ന സംവിധാനമാക്കി മാറ്റുക.

ഓഫ്‌ലൈൻ + ഓൺലൈൻ ഗ്രാമസഭ.

അപ്പോൾ എന്താണ് ഓൺലൈൻ ഗ്രാമസഭ?

ആവശ്യപ്രേരിത ജനാധിപത്യം നടപ്പിലാക്കുന്നതിനുള്ള ഒരു ജനപങ്കാളിത്ത ഉപകരണമാണ് ഓൺലൈൻ ഗ്രാമസഭ. ഗ്രാമസഭയെ ഒരു യോഗത്തിൽ നിന്ന് ഒരു തുടർച്ചയായ ജനപങ്കാളിത്ത സംവിധാനമാക്കുക എന്നതാണ് ഇതിന്റെ ലക്ഷ്യം.

യോഗത്തിലേക്ക് ഓൺലൈൻ പ്രവേശനം ≠ ഓൺലൈൻ ഗ്രാമസഭ

വീഡിയോ വഴി ഒരു ഗ്രാമസഭാ യോഗത്തിൽ പങ്കെടുക്കുന്നത് നിലവിലുള്ള യോഗത്തിലേക്ക് ഓൺലൈൻ പ്രവേശനം മാത്രമാണ്. ഓൺലൈൻ ഗ്രാമസഭയിൽ ഒരു ആവശ്യം ഉന്നയിക്കുന്നതുമുതൽ അത് പരിഹരിച്ച് പദ്ധതി പൂർത്തിയാക്കി അവലോകനം ചെയ്യുന്നതുവരെയുള്ള ഓരോ ഘട്ടത്തിലും ജനങ്ങൾക്ക് പങ്കെടുക്കാനും വിവരങ്ങൾ പരിശോധിക്കാനും അഭിപ്രായം രേഖപ്പെടുത്താനും കഴിയും.

2013-ൽ വിഭാവനം ചെയ്ത സേവാഗ്രാമങ്ങൾ സ്ഥാപിക്കുന്നതിലൂടെ മൊബൈൽ ഇല്ലാത്തവർക്കും മൊബൈൽ ഉപയോഗിക്കാൻ അറിയാത്തവർക്കും ഓൺലൈൻ ഗ്രാമസഭയിൽ പങ്കെടുക്കാം.

ഈ സ്ഥിരം ഗ്രാമകേന്ദ്രങ്ങൾ വഴി ആവശ്യങ്ങൾ അറിയിക്കാനും ചർച്ചകളിൽ പങ്കെടുക്കാനും കഴിയും.

ഇതോടെ ഗ്രാമസഭയുടെ പരിധി എന്താകും?

വാർഡ് → പഞ്ചായത്ത് → ബ്ലോക്ക് → ജില്ല → സംസ്ഥാനം → ദേശീയതലം